Улсын Их Хурлын Төрийн байгуулалтын байнгын хороо өнөөдөр /2025.07.09/ хуралдаж, Бүсчилсэн хөгжлийн дэд хорооны болон Ёс зүйн дэд хорооны бүрэлдэхүүний тухай асуудлыг хэлэлцлээ.

УИХ дахь МАН-ын бүлгийн дарга Ж.Бат-Эрдэнэ, УИХ-ын Бүсчилсэн хөгжлийн дэд хороог УИХ-ын гишүүн М.Бадамсүрэн, Ж.Бат-Эрдэнэ, Э.Болормаа, Ц.Идэрбат, Н.Номтойбаяр, Б.Пүрэвдорж, Ц.Сандаг-Очир, Ц.Туваан, Г.Уянгахишиг нарын бүрэлдэхүүнтэй, УИХ-ын Ёс зүйн дэд хороог УИХ-ын гишүүн О.Алтангэрэл, А.Ариунзаяа, Б.Баярбаатар, Ч.Лодойсамбуу, Ч.Номин, О.Саранчулуун, Б.Хэрлэн, Д.Энхтуяа, Ө.Шижир нарын бүрэлдэхүүнтэй байгуулах саналыг танилцуулсан.

Төрийн байгуулалтын байнгын хорооны хуралдаанаар УИХ-ын гишүүн М.Бадамсүрэнг ажлын туршлага, төрийн албанд ажилласан мэдлэг, ур чадварт үндэслэн УИХ-ын Бүсчилсэн хөгжлийн дэд хорооны даргаар сонгохыг гишүүдийн олонх нь дэмжлээ.

М.Бадамсүрэн нь 1996-2000 онд Шинжлэх ухаан технологийн их сургуулийг газрын тосны инженер мэргэжлээр, 2013-2015 онд Удирдлагын академийг төрийн захиргааны менежментийн чиглэлээр төгссөн.

Ажилласан байдал

•2001-2002 онд Дорнод аймаг дахь Нефть хангамжийн газрын түгээгч, эрхлэгч

•2007-2009 онд Магнай трейд ХХК-ийн салбарын дарга

•2009-2012 онд Дорнод аймгийн Монгол Ардын Намын хорооны дэд дарга

•2012 оноосДорнод аймгийн Монгол Ардын Намын хорооны дарга

•2014-2015 онд Дорнод аймгийн Засаг даргын орлогч

•2015-2024 онд Дорнод аймгийн Засаг дарга

•2024 оноос Монгол Улсын Их Хурлын гишүүнээр сонгогдон ажиллаж байна.