БЗД-ийн дөрөвдүгээр хорооны гуравдугаар байрны орцны жижүүрээс өнгөрсөн сарын 18-нд коронавирусын халдвар илэрсэн. Тэрбээр гурван хүүхэдтэйгээ амьдардаг байсан бөгөөд хамгийн бага хүүхэдтэйгээ ХӨСҮТ-д эмчлүүлж буй. Харин хоёр том 17, 4 настай хоёр хүүхдээс нь вирус илрээгүй тул тусгаарлалтын хоног нь өчигдөр дуусч гэртээ харьжээ.

Гэвч тус байрны СӨХ-ийн дарга болон оршин суугчид хүүхдүүдийг хөөж, гэрт нь оруулахгүй байсан тул иргэд БЗД-ийн ГБХЗГ-т ханджээ. Энэ дагуу өчигдөр орой 20 цагийн үед хоёр хүүхдийг Хамгаалах байранд авчээ. Тэд гэртээ тусгаарлагдах 14 хоногийн хугацаанд Хамгаалах байранд байрлахаар болсон байна.