Хятад улсад тархаад байгаа амьсгалын замын вирусний улмаас дөрвөн хүн нас барж, 222 хүн өвчлөөд байна. Тэгвэл тус вирус хүнээс хүнд дамжин халдварлах боломжтойг Хятадын засгийн газраас томилсон мэргэжилтэн мэдэгдлээ.

Хятадын үндэсний эрүүл мэндийн хорооноос өвчний хоёр тохиолдол хүнээс халдварласан болохыг тогтоожээ.

Өмнө нь удирдлагууд шинэ вирус Хятадын Үхань хотын далайн бүтээгдэхүүний захаас амьтнаас хүнд халдварласан гэж мэдэгдэж байсан. Гэвч сүүлийн хэдэн өдөр Үхань хотоос хол амьдардаг хоёр хүн вирусээр өвчлөөд байгаа юм.

Гуандун мужид амьдардаг гэр бүлийн хоёр гишүүн Үхань руу аялаад ирсэн гишүүнээсээ халдварласан гэжээ.

Түүнчлэн 15 эмнэлгийн ажилтан коронавирус туссан болохыг баталжээ.

Бээжинд нийт таван тохиолдол гараад байгаа. Тайландад хоёр тохиолдол, Япон, Солонгост тус бүр нэг хүн вирусээр халдварласан байна. 

Хятадын шинэ жилийн баяр нэгдүгээр сарын 25-нд болно. Баярын үеэр хэдэн зуун сая хүн аялах учраас вирусийн тархалт нэмэгдэж магадгүй гэсэн айдас байна.  

Дэвсгэр мэдээ

Корнавирус бол вирусийн нэг бүл. Гэхдээ корнавирусын төрлөөс зөвхөн зургаа нь л хүнд халдварлах боломжтой байдаг. Харин шинэ вирус долоо дахь нь болж байгаа юм.  

2002 онд Хятадад гарсан корнавирусээр үүсгэгддэг хүнд хэлбэрийн амьсгалын замын хам шинжээр 8.098 хүн өвчилснөөс 774 нь нас барсан байдаг.

Коронавирусын төрлүүд энгийн ханиаднаас үхэлд хүргэх ч чадалтай. Харин шинэ вирусийн хувьд дунд хавьцаа нь байгаа аж.