Цагдаагийн байгууллагад өчигдөр буюу энэ сарын 11-ний 19.00 цагийн орчимд Төв аймгийн Өндөрширээт сумын Талын-Уул гэх газарт "Автомашинууд мөргөлдөж, хүн нас барсан байна” гэсэн дуудлага, мэдээлэл бүртгэгджээ.

Урьдчилсан байдлаар Төв аймгийн Өндөрширээт сумын нутаг дэвсгэрт байх Талын-Уул гэх газар буюу Улаанбаатар-Арвайхээр чиглэлийн авто замын 170 дахь км-ийн ойролцоо Toyota Hiace маркийн автомашин Улаанбаатараас Завхан аймгийн чиглэлд зорчиж явсан Kia Grandbird маркийн том оврын автобустай мөргөлдсөн байна.

Ослын улмаас Toyota Hiace маркийн түргэний автомашинд зорчиж явсан 5 хүн, жолоочийн хамт буюу нийт 6 хүн нас барж, 2 хүүхэд гэмтсэн ослыг Төв аймгийн цагдаагийн газар шалгаж байна.

Нас барсан 6 хүний хоёр нь хүүхэд байжээ. Харин гэмтсэн хоёр хүүхдийн тухайд 7,14 настай бөгөөд биеийн байдал маш хүнд байна.