Нийгмийн цахим сүлжээнд 16 хүртэлх насны хүүхдийн оролцоог зохицуулах судалгааг эхлүүлсэн талаар Боловсролын сайд П.Наранбаяр мэдээлэл өглөө. Тэрбээр "Боловсролын сайдын зөвлөх Д.Гантулгаар ахлуулсан ажлын хэсэг байгуулагдлаа. Австрали улс 16 нас хүртэл хүүхдийг Tiktok, Twitter, Snapchat, Facebook зэрэг олон нийтийн сүлжээнд хандахыг нь хориглосон хуулийг баталсан нь дэлхий нийтийн анхааралд байгаа. Тэгвэл энэ хуулийг судлах, улмаар үр нөлөөг нягтлах, монголд олон нийтийн сүлжээнд 16 хүртэлх насны хүүхдийг орохыг хориглох хуулийг судлахаар ажлаа эхлүүлж байна. Энэ өөрчлөлтийг хийхийн тулд судалгаа, нийгмийн зөвшилцөл хэрэгтэй. Эрх ашиг нь хөндөгдөж байгаа бүхий л бүлгүүдтэй бид ярилцана" гэлээ.
