Гүйцэтгэх засаглалаа толгойлж буйн хувьд хэлж буй үг, гаргаж буй шийдвэр бүрээ "хар толгойгоороо хариуцах" чухал албан тушаал бол Ерөнхий сайдын албан тушаал. Төрийн өндөр дээд албан тушаал гэдэг утгаараа сайнаасаа саар зүйлсээр нь авторлогдож байдаг эл албан тушаалд өнгөрсөн 30 гаруй жилийн түүхэнд буюу 1992 оноос хойш нийт 16 хүн Ерөнхий сайдын алба хашжээ. Үүний хоёр нь үүрэг гүйцэтгэгчээр маш богино хугацаанд ажилласан байдаг.

Тэгвэл үе үеийн Ерөнхий сайд нараас хамгийн удаан хугацаагаар сонгогдон ажилласан Ерөнхий сайд нараас ТОП 5-ыг нь танилцуулж байна.

ТОП 5-д та бүхний харж байгаачлан Н.Энхбаяр, Л.Оюун-Эрдэнэ, П.Жасрай, У.Хүрэлсүх, Сү.Батболд нар жагсаж байна. Цаг хугацааны хувьд авч үзэхэд, Ерөнхийлөгч асан Н.Энхбаяр тэргүүлж байгаа боловч одоогийн Ерөнхий сайд Л.Оюун-Эрдэнэ энэ жагсаалтыг тун удахгүй тэргүүлэх нь ойлгомжтой харагдаж байгаа юм. Учир нь тэдний эрэмбэлэгдэж байгаа хугацаанд одоогийн байдлаар 22 хоногийн л зөрүү үлдээд байна.

Эдгээр таван эрхмийн араас Н.Алтанхуяг /2 жил, 87 хоног/, С.Баяр /1 жил, 341 хоног/ , М.Энхболд /1 жил, 301 хоног/, М.Энхсайхан /1 жил, 278 хоног/ , Ч.Сайханбилэг /1 жил, 229 хоног/ гэсэн хүмүүс эрэмбэлэгдэж байгаа юм.

Ерөнхий сайд нартай холбоотой зарим сонирхолтой мэдээллээс хүргэхэд,

-Хоёр үүрэг гүйцэтгэгч гэдэгт Д.Тэрбишдагва, Ням-Осорын Туяа нар хамаатна. Ням-Осорын Туяа 8 хоног үүрэг гүйцэтгэгч хийсэн байдаг бол Д.Тэрбишдагва 16 хоног ажилласан байдаг аж.

-1992 оноос хойш албан ёсоор томилогдсон 16 Ерөнхий сайдын 8 нь МАХН, МАН-ынх бол үлдсэн 8 нь Ардчилсан намынх байгаа юм.

-Ерөнхий сайд нар дундаас хамгийн анх удаа өөрийн хүсэлтээр огцрох өргөдлөө өгсөн хүн бол У.Хүрэлсүх. Түүний хувьд 2020 онд дахин улиран Ерөнхий сайдад томилогдсон боловч томилогдсоноос хойш долоон сарын дараагаар огцрох өргөдлөө өгч, Засгийн газар бүрэн бүрэлдэхүүнээрээ огцорч байлаа.