Монголын кино урлангийн санг өргөжүүлэн, сонирхолтой уран бүтээлүүдийг үзэгчдийн хүртээл болгох эрхэм зорилготой Orange entertainment болон Voo хамтын ажиллагааны мастер гэрээнд (урт хугацааны хамтран ажиллах гэрээ) гарын үсэг зуржээ.

Уг ажиллагааны хүрээнд эхлүүлсэн анхны томоохон уран бүтээл болох “Амьдрал” ОАК үзэгчдийн хүртээл болоход бэлэн болоод байна. Кино төсөл 211 хоногийн хугацаанд 300 гаруй хүний хүч хөдөлмөрөөр бүтжээ. “Амьдрал” ОАК-ны зураг авалтын 80 орчим хувь нь Эрдэнэт хотод үргэлжилсэн байна. Киноны гол үйл явдал хамаг амьдралаа гартаа атгасан хэмээн бодож байсан Мэс заслын эмч Нарангэрэл болон түүний гэр бүлийн эргэн тойронд өрнөх юм.

Тус киноны гол дүрд МУСТА Р.Анхням, Х-түц продакшны залуу жүжигчин Э.Төрбат, МУСТА Guys хамтлагийн дуучин Д. Лхагва нар тоглосон бөгөөд хүний амьдралын чухал үед тооцогддог 40 болон 20 насны хайр сэтгэл, амьдралын ээдрээг зэрэгцүүлэн харуулсан байна. Жүжигчдийн бүрэлдэхүүний хувьд туршлагатай уран бүтээлчдээс гадна шинэ залуу уран бүтээлчдийг оруулснаараа онцлог юм.

2025 оны 01 сарын 16-аас гарч эхлэх романтик, медикал, драма жанрын 12 ангит Амьдрал ОАК-ны шинэ ангиудыг та 7 хоног бүрийн пүрэв гаригт Voo-с, Бямба гаригт NTV телевизээр тус тус үзэх боломжтой.