АНУ-д өнгөрсөн тавдугаар сарын 25-нд Жорж Флойдыг баривчлах үедээ амь насыг нь хохироосон цагдаагийн офицер Дерек Чоувин хүн амины хэрэгт яллагдсан юм. Тэрбээр АНУ-ын Миннесота муж улсын Хеннепин хотын шоронд хоригдож байсан ч нэг сая ам.долларын барьцаа төлснөөр батлан даалтад суллагджээ. Улмаар ард иргэдийн дунд дахин бослого тэмцэл, эмх замбараагүй байдал үүсэхээс сэргийлэн Үндэсний гвардыг бэлэн байдалд байхыг Миннесота муж улсын захирагч үүрэг болгосон байна. Тус муж улсад 100 орчим цэрэг, Үндэсний гвардын 75 алба хаагчийг бэлэн байдалд шилжүүлжээ.

Дерек Чоувин нь сэжигтэн Жорж Флойдыг баривчлах үедээ хүзүүн дээр нь есөн минут өвдөглөн сууж, амьсгал авах боломж олгохгүй байсаар амь насыг нь хөнөөсөн аж. Тухайн үеийн бичлэг цахим ертөнцөд тарснаар АНУ төдийгүй дэлхийн олон оронд арьс өнгөөр ялгаварлах үзэл, цагдаагийн хүчирхийллийн эсрэг эсэргүүцлийн жагсаал өрнөж, эмх замбараагүй байдал үүсгэсэн байна.