Өвөрхангай аймгийн Сант сумын АН-ын дарга МАН-ын ухуулагчийн гарт амиа алдсан харамсалтай хэрэг гарсан. Үүнтэй холбоотойгоор АН-аас ажлын хэсэг байгуулагдаж ажиллаж буй. УИХ-ын гишүүн С.Одонтуяагаар ахлуулсан тус ажлын хэсэг өнөөдөр /2024.06.17/ мэдээлэл хийлээ.

Энэ үеэр тэрбээр "Хүний алтан аминаас илүү сонгууль гэж байх ёсгүй. Ардчилсан намд маш том гарз тохиолоо. Ардчиллын тугийг мандуулагч талийгаач н.Баянмөнх сумынхаа ИТХ-д гурван удаа, тус сумынхаа намын даргаар хоёр удаа сонгогдсон шилдэг боловсон хүчин байсан. Харамсалтай нь өөрийн гэсэн үзэл бодолтой байсныхаа төлөө бусдын гарт амиа алдсан харамсалтай үйл явдал тохиолоо. АН-ын дарга Л.Гантөмөр гэр бүл, төрөл төрөгсөд, журмын нөхдөд нь эмгэнэл илэрхийлэхээр Өвөрхангай аймгийн Сант сум руу өөрийн биеэр явлаа. Өчигдрөөс хойш Монгол орны өнцөг булан бүрээс зэвүүцсэн, гашуудсан АН-ын гишүүдийн эмгэнэл тасрахгүй байна. МАН өчигдөр нэг нэр дэвшигчийнхээ нэрийг сонгуулиас татлаа гэсэн улс төрийн мэдэгдэл хийсэн. Энэ бол хүний амь настай дүйцэх зүйл биш. Тиймээс энэхүү тойрогт нэр дэвшиж байгаа МАН-ын есөн нэр дэвшигчийг багаараа нэрээ татаж улс төрийн хариуцлагаа бүрэн хүлээх ёстой гэж АН-ын гишүүд шаардаж байна. Аливаад хүн чанар, хүн ёсны асуудал гэж байдаг.

2024 оны дөрөвдүгээр сарын 22-нд С.Зоригийн төрсөн өдрөөр хөшөөнд цэцэг өргөх үеэр миний бие эрх баригчдад дахин дахин сануулсан. Цагаатгалын ажлыг удирдан зохион байгуулах комиссын даргын хувьд хэлэхэд, бид нар 100 жил болоод ч энэ хэлмэгдсэн хүмүүсээ цагаатгаж дуусахгүй байна шүү. Сонгуулийн үеэр хэт их улс төржилт шаардлагагүй, хэн нэгнээ үзэн ядсан асуудал ямар гашуун түүх авч ирдгийг би өмнө хэлсэн. Өдөр бүр нэг нэгнийг нь үзэн ядуулсан, улс төржүүлсэн, улс төрчийн үхлээр шоу хийсэн нэвтрүүлгийг орон даяар, телевизийн бүх сувгаар олон давтамжтай явуулсан. Эцэстээ юунд хүрдэгийг бид харлаа. Ийм учраас Ерөнхий сайд, МАН-ын дарга Л.Оюун-Эрдэнийг хариуцлага хүлээж, огцрохыг АН-ын гишүүд бид шаардаж байна.

Мөн бусад улс төрийн намууддаа сонгуульдаа шударгаар өрсөлдөцгөөе, хүн чанартай байцгаая, хэн нэгэн улс төрчийн үхлээр шоу хийдгээ зогсооё, сонор сэрэмжтэй байцгаая, ард иргэдээ хүндэлцгээе гэж уриалж байна. Манай сонгуулийн ажлын хэсгүүд нийт 30 гаруй гомдол гаргасан боловч холбогдох газрууд ажлаа хийхгүй байсаар өнөөдөр хүний амь нас эрсдэхэд хүргэж байна. Хэрвээ тэд ажлаа хариуцлагатай хийж, цаг тухайд нь арга хэмжээ авсан бол өнөөдөр ийм байдалд хүрэхгүй байсан. Бид энэ бүхнийг мартаад өнгөрөхгүй, маш нарийн судалгаа дүгнэлттэй ажиллана. Энэ зөвхөн Сант суманд гарсан асуудал биш. Маш олон суманд ийм асуудал гарсан байна. 2024 оны зургаадугаар сарын 17-ны өдөр буюу өнөөдөр 17-19 цагийн хооронд Монгол орны өнцөг булан бүрт байгаа АН-ын бүх гишүүд намынхаа тугийг бөхийлгөж эмгэнэлийн үйл ажиллагаанд нэгдэхийг уриалж байна" гэв.

-Даргад зориулсан нийгэм бүтээчихсэн юм байна-

Хууль зүйн сайд асан Х.Тэмүүжин "Өвөрхангайд болсон харамсалтай хэрэгт холбогдуулан гурван зүйлийг хэлэхийг хүсэж байна. Нэгдүгээрт, МАН үнэхээр даргад зориулсан нийгэм бүтээчихсэн байна. Г.Занданшатар даргаар ахлуулсан Монгол Ардын Намын том дарга нар ирсэн учраас хуралд нь суух ёстой гэх тал зассан байдлын үр дүнд нэг ардчилагчийн амь нас үрэгдлээ. Энэ нийгэм дан ганц дарга нарт зориулагдаагүй. Тэр дундаа дарга нарын төлөө амиа золих үүрэггүй шүү гэдгийг сануулмаар байна.

Хоёрдугаарт, хуультай, хуульгүй хоёр нийгэм үүсгэчхэж. Ийм хандлага тогтчихож. МАН-тай холбоотой хүмүүст хууль үйлчилэхгүй, жирийн ард иргэдэд бол хатуу ширүүн болсон байна.

Гуравдугаарт, энэ хавар, зунжингаа эрх мэдэлтэй хүмүүс алуурчдаар шоудлаа. Үр дүнд нь хүмүүс өөр үзэл бодолтой байсныхаа төлөө амиа алдаж байна. Эцэст нь хэлэхэд дарангуйлал Монголд томорсон байна. Сүүдэр нь жирийн иргэний хагацал дээр туслаа. Тиймээс энэ хуультай, хуульгүй болгож хуваасан хүмүүсийн толгой дээр нь хуулийг аваачих ёстой. Дарга нарт таалагдах гэж бусдыг үл тоомсорлодог хандлагыг өөрчлөх ёстой. Энэ гэмт хэргийн намыг солих ёстой" гэлээ.

Б.МӨНХЗАЯА