Ногоон автобусны сонсгол Нийтийн тээврийн автобус нийлүүлэгчтэй байгуулсан гэрээ, гэрээний нэмэлт өөрчлөлтийн талаарх мэдээллээр үргэлжилж байна.
Нийтийн тээврийн газрын дарга Д.Отгонжаргал "2023 оны наймдугаар сарын 23-нд хийсэн гэрээний дагуу БНСУ-д үйлдвэрлэсэн 19 хүний суудалтай 50 ширхэг COUNTY маркийн автобус нийлүүлэгдсэн. Би өнгөрсөн оны аравдугаар сард ажлаа авсан. Нийслэлийн Засаг даргын үүргийн дагуу ГЕГ-т хандахад, татвар төлөөгүй байна гэх асуудал гарч ирсэн.
"Тэнүүн-Огоо" ХХК нь татварын хөнгөлөлтөд хамрагдах заалтыг худал мэдүүлсэн. Улмаар татвараас зайлсхийсэн гэх асуудлыг ГЕГ, ЦЕГ хоёр сарын турш шалгасан хэдий ч гэрээний дагуу төлөх үүрэггүй гэж үзсэн. Иймд нийслэлийн зүгээс 1.7 тэрбум төгрөгийн гаалийн татварыг 12-р сард ГЕГ-ын дансанд төлсөн.
Үүний дараа үнийн зөрүүнээс шалтгаалж, 50 автобуснаас 48-ыг нь авсан. Дээрх автобуснуудыг энэ оны нэгдүгээр сард үйлчилгээнд гаргасан хэдий ч нэмэлтээр заагдсан халаагуур, дэлгэц, камерын бүрдэл хангагдаагүй гэх үндэслэлээр үйлчилгээнээс буцааж татсан" гэх мэдээллийг өглөө.
