Монгол Улсын Ерөнхийлөгч Халтмаагийн Баттулга Сүхбаатарт аймагт ажиллалаа. 2010 онд батлагдсан Төрөөс төмөр замын талаар баримтлах бодлогын хэрэгжилтийн хүрээнд Баруун-Урт сумаас 6 км зайд орших Сайншанд-Баруун-Урт чиглэлийн 317 км төмөр замын төгсгөлийн цэгт мэргэжилтнүүдийн хамт ажиллажээ. Ерөнхийлөгч Х.Баттулга “Монголчууд өөрсдөө төмөр замаа барьж, бетон дэрээ үйлдвэрлэж чаддаг гэдгийг Цогтцэций-Гашуунсухайт, Цогтцэций-Зүүнбаян чиглэлд барьж буй 700 орчим км төмөр замын ажлаар батлан харуулсан. Одоо бид зүүн бүсийн босоо тэнхлэгийн төмөр зам, Баруун-Уртыг Чойбалсантай холбох ажлыг эхлүүлэх хэрэгтэй” гэж онцлов.