Соёлын гавьяат зүтгэлтэн Ч.Галсан Монгол Улсын Ерөнхийлөгчийн зарлигаар Хөдөлмөрийн баатар цол хүртлээ. Үндэсний тусгаар тогтнолоо сэргээн мандуулсны өдөрт зориулан Ерөнхийлөгч У.Хүрэлсүхийн зарлигаар төрийн дээд цол, одон, медаль гардуулах ёслолын үйл ажиллагаа Төрийн ордонд үргэлжилж байна.

Зохиолч Ч.Галсан 1943 онд Баян-Өлгий аймгийн Цэнгэлхайрхан суманд төрсөн. 1968 онд Ардчилсан Германы Лейпциг хотын их сургуулийн герман хэл утга зохиолын анги төгсөж багш болжээ. 1960-аад оноос шүлэг бичиж эхэлсэн. Зохиолч, сурвалжлагч. МУИС-д герман хэлний багш болон сонин сэтгүүлийн газарт сурвалжлагч, утга зохиолын ажилтан хийж байгаад уран бүтээлээ дагнан эрхлэх болсон. 1992 онд А.Ф. Шамессогийн нэрэмжит шагналыг “Тува” туужаараа, 1995 онд шилдэг номд олгодог Пуххаймын шагналыг “Дуу өндөрлөх цагаар” номоороо, 2002 онд “ Аянгат цагийн тууж” номоороо МЗЭ-ийн шагнал, 2006 онд Соёлын гавьяат зүтгэлтэн цол авчээ.