"Тавантолгой Түлш" компаниас “Өвөлжилтийн бэлтгэл ажил”-ын хүрээнд шахмал түлшний нөөц бүрдүүлэлт, худалдан борлуулалт зэрэг цаг үеийн асуудлаар мэдээлэл хийж байна. Энэ үеэр Технологийн бодлогын хэлтсийн дарга Д.Өлзийбат дараах мэдээллийг өглөө. Тэрбээр,

"Галлагааны улиралын нөөц бүрдүүлэлтийн ажлын хүрээнд 120 мянган тонн шахмал түлш үйлдвэрлэх төлөвлөгөө гаргасан байсан бол өнөөдрийн байдлаар 119 мянган тонн шахмал түлш үйлдвэрлэсэн байна. Энэ жил зүүн үйлдвэр дээр гол ачааллаа авч ажиллаж байгаа.

Харин 2023 онд 539,628 тонн түлш үйлдвэрлэх төлөвлөгөөтэй байгаа. Одоогоор нөөц бүрдүүлэн ажиллаж байна" гэв.

Мөн үргэлжлүүлэн, "Хагас коксын шахмал түлш үйлдвэрлэх туршилтын ажил өнгөрсөн хавраас хойш хийгдсэн. Туршилтын ажил бүрэн дууссан. Энэ жилийн хувьд 12 дугаар сараас нэгдүгээр сарын 15-ны өдөр хүртэл нийт нэг сарын хугацаанд хэсэгчилсэн бүсэд туршилт хийхээр болсон.

Түүнчлэн хагас коксын үйлдвэрийн ТЭЗҮ ерөнхийдөө бэлэн болсон. УУХҮЯ-ны зөвлөлөөр хэлэлцэгдэж байгаа, ирэх 10 дугаар сард бэлэн болно. Хагас коксын үйлдвэрийн хүчин чадал Багануурын уурхайг түшиглэж баригдаж байгаа. Тэгэхээр жилд 1,2 сая тонн нүүрсийг хагас коксжуулж, 600-650 мянган тонныг гаргаж авах ТЭЗҮ боловсруулагдаж байгаа" хэмээсэн юм.