Эрүүл мэндийн яамнаас коронавируст халдварын нөхцөл байдлын талаар мэдээлэл хийв. 

Энэ үеэр Халдварт өвчин судлалын үндэсний төвийн Ерөнхий захирал Д.Нямхүү шинжилгээний хариуг танилцууллаа.

Тэрбээр “2020 оны долдугаар сарын 17-нд ХӨСҮТ, Дархан-Уул аймгийн, ЗӨСҮТ-ийн лабораторид нийт 555 хүний сорьцод шинжилгээ хийхэд 530-д нь коронавирус илрээгүй. Харин 25 хүний сорьцод коронавирусийн халдвар илэрлээ. Афганистанаас ирсэн зэвсэгт хүчний 25 дайчдаас халдвар илэрлээ. Афганистанаас 113 дайчин эх орондоо ирснээс 53-аас нь коронавирус илрээд байна. Давтан шинжилгээг үргэлжлүүлэн хийнэ.

Шинжилгээний хариу нь сөрөг гарсан 530 хүнийг задалбал энэ сарын 15-нд Сөүл-Улаанбаатар чиглэлийн тусгай үүргийн онгоцоор ирсэн 182 иргэн, сайн дурын буюу эх орондоо буцаж буй БНХАУ-ын 240 иргэн, Алтанбулаг боомтоор хил нэвтэрсэн ачаа тээврийн 23 жолооч, Сэлэнгэ аймагт тусгаарлагдсан 2, идэвхтэй тандалтын зорилгоор санамсаргүй түүврийн 9 сорьц, ХӨСҮТ-д тусгаарлагдсан 28 хүнээс тус тус коронавируст халдвар илрээгүй байна.

Монгол Улсад коронавируст халдварын нийт батлагдсан 287 тохиолдлоос 211 хүн эдгэрлээ. Одоогоор 76 хүн эмчлүүлж байгаагаас 69  нь хөнгөн 7 нь хүндэвтэр байна. Халдварт өвчин судлалын үндэсний төв нийт 140 хүн эмчилгээ тандалт хяналтын дор байна” гэв.