ХӨСҮТ-ийн ерөнхий захирал Д.Нямхүү ЭМЯ-ны ээлжит хэвлэлийн хуралд оролцож, COVID-19 халдварыг илрүүлэх шинжилгээний хариунуудыг танилцууллаа.

Тэрбээр "Долдугаар сарын 9-ны өдөр дөрвөн лабораторид нийт 328 хүний сорьцод шинжилгээ хийхэд бүгдэд нь илрээгүй. Үүнийг задалж хэлбэл,

• ХӨСҮТ-д тусгаарлагдсан 3,
• Долдугаар сарын 8-нд Сөүл-Улаанбаатар чиглэлийн тусгай үүргийн нислэгээр ирж, ажиглах байранд тусгаарлагдсан 261,
• Ажиглах байранд тусгаарлагдсан 29,
• Тандалтын зорилгоор Сонгинохайрхан, Чингэлтэй, Сүхбаатар дүүргийн Нэгдсэн эмнэлгээс санамсаргүй байдлаар цуглуулсан 9, 
• Ачаа тээврийн 25 жолооч,
• Сэлэнгэ аймагт тусгаарлагдан хянагдаж буй 1 хүний шинжилгээнд халдвар илрээгүй.

Монгол Улсад коронавирусний батлагдсан тохиолдлын тоо 227 байна. Үүнээс 197 хүн эмнэлгээс эдгэрч гарсан, 30 хүн ХӨСҮТ-д эмчлэгдэж байна. Биеийн байдлыг үнэлбэл, 27 нь хөнгөн, 3 нь хүндэвтэр байна. Мөн жирэмсэн эмэгтэй нэг, чихрийн шижин өвчтэй нэг иргэн эмчлүүлж байна.

Долдугаар сарын 11-ны 01:00 цагт ирсэн Истанбул-Улаанбаатар чиглэлийн тусгай үүргийн нислэгт зорчиж байсан 42 настай эмэгтэй агаарын хөлөгт амаржиж, хоёр ихэр хүүхэдтэй боллоо. Эх, хүүхдүүдийг ХӨСҮТ-д тусгаарлагдаж байна" гэв.