Эрүүл мэндийн яамнаас коронавирусний халдварын нөхцөл байдал,  тархалтын талаарх ээлжит мэдээллээ хийлээ. 

ЭМЯ-ны хэлтсийн дарга Д.Нарангэрэл : Дэлхийн 216 улсад коронавирусний халдвар бүртгэгдсэн байна.  Өнөөдрийн байдлаар 10 сая 978 мянган хүн өвчилж, 522 мянган хүн нас барсан байна. Одоогоор 4.1 сая хүн эмнэлэгт хэвтэн эмчлэгдэж байна. Сүүлийн 24 цагт 183  мянган хүн шинээр өвчилж 4 мянга гаруй хүн нас барсан. 

Мөн сүүлийн 24 цагт АНУ-д 54 мянган тохиолдол, Бразилд 48 мянган тохиолдол, Энэтхэгт 21 мянган тохиолдол шинээр бүртгэгдэж өвчлөл эрчтэй нэмэгдсэн эхний гурван улс болж байна.

Харин ОХУ-д сүүлийн 24 цагт 6 мянган хүн шинээр халдвар авч 147 эндсэн байна.  Монгол Улстай хил залгаа Тувад 112 тохиолдол, Буриадад 34 тохиолдол,  Читид 51 тохиолдол тус тус шинээр бүртгэгдсэн.

Манай улсын хувьд  өчигдөр 274 хүн ажиглалтаас гарч гэрийн тусгаарлалт руу шилжиж, 541 хүн шинээр ажиглалтанд орсон.

Өнөөдрийн байдлаар улсын хэмжээнд нийт 2712  иргэн ажиглалт, тусгаарлалтанд байна. 

Өчигдөр БНСУ-аас хоёр тусгай үүргийн онгоцоор 420 хүн, АНУ-аас 25, Дорноговь аймгийн Замын-Үүдийн боомтоор 95 хүн орж ирсэн.  Эдгээр иргэдээс ХӨСҮТ-д 9, цэргийн төв эмнэлэгт 22 хүнийг тусгаарласан. Бусад хүмүүсийг буудлуудад байршуулсан. 

Цэргийн төв эмнэлэгт 88 хүн эмчлэгдэж байна. Эдгээр хүмүүст 14 их эмч, 42 асрагч, сувилагч нар эмнэлгийн тусламж үйлчилгээ үзүүлж байна.