Сүүлийн өдрүүдэд Боловсролын зээлийн сангаас зээл авч суралцсан улс төрчидтэй холбоотой мэдээлэл олон нийтийн шүүмжлэлийг дагуулаад буй. Тэгвэл Ерөнхий сайдын хэвлэлийн төлөөлөгч Л.Болортуяа Ерөнхий сайдын БЗС-гаас ямар нэгэн зээл аваагүй гэдгийг мэдэгдэхийн сацуу ирэх долоо хоногт дахин хоёр сангийн мэдээлэл ил болох тухай өөрийн албан ёсны цахим хаягаараа мэдээллээ. Тэрбээр "Засгийн газраас зарласан Авлигын эсрэг 5Ш ажиллагааны "Шилэн" ажиллагаа, холбогдох хуулийн хүрээнд Боловсролын зээлийн сангийн мэдээлэл нээлттэй болсон. Үргэлжлээд ирэх даваа гарагт дахиад 2 сангийн мэдээлэл нээлттэй болно. Дээр нь Ерөнхий сайд БЗС болон аль нэг төрийн сангаас зээл авч байгаагүйг мэдэгдье. Засгийн газар, Ерөнхий сайдын Авлигатай хийх тэмцэл улам идэвхжинэ" гэв.