Засгийн газраас зохион байгуулж буй "Таван Ш" ажиллагааны хүрээнд УИХ-ын гишүүн, ХХААХҮ-ийн сайд асан Т.Бадамжунайг Сөүл-Инчеоны онгоцоор авч ирлээ. Энэ үеэр ХЗДХ-ийн сайд Х.Нямбаатар мэдээлэл өглөө. Тэрбээр "Филиппин улсын хууль сахиулах байгууллагын удирдлагуудтай уулзаж бичгээ гардуулсан. Үүний хүрээнд Т.Бадамжунайгийн гадаад пасспортыг хүчингүй болгож, дансыг нь царцаах шийдвэр гарсан талаар танилцуулсан. Улмаар түүнийг шилжүүлэн авах талаар албан бичгээ гардуулсан. Үүний дараагаар тус улсын Хууль сахиулах байгууллагуудын зүгээс Т.Бадамжунайг албадан саатуулсан. Саатуулах процесс нийт 10 гаруй цаг үргэлжилсэн. Бид хүсэлт тавьсан. Иргэн Т.Бадамжунай өөрийн хүсэлтээр албадан гаргахад татгалзах зүйлгүй, өөрөө Монгол руу явах хүсэлтэй гэдгээ илэрхийлсэн" гэлээ.