Түлхүүр мэдээлэл:

• Бельгийн ханхүү хорио цээр зөрчиж, өөрийн Испани эмэгтэй найзын хамт үдэшлэгт оролцжээ.
• Уг үйл явдлаас 2 хоногийн дараа ханхүү Ковид-19 халдвар авсан нь тогтоогдсон байна.
• Ханхүү одоогоор өвчний хөнгөн шинж тэмдэгтэйгээр тусгаарлагдаж байгаа аж.

Бельгийн хаан Филиппийн дүү болох Астрид гүнжийн гуравдахь хүү, өдгөө 28 настай Иохам ханхүү нь хорио цээр зөрчиж, Испанийн Кордоба хотод болсон олон нийтийн цугларалтад оролцжээ. Улмаар тухайн өдрөөс хоёр хоногийн дараа ханхүү коронавирусний шинжилгээ өгөхөд хариу эерэг буюу халдвартай гарсан байна.

Иохам ханхүү өөрийн Испани эмэгтэй найз болон түүний гэр бүлтэй хамт олон нийтийн арга хэмжээнд оролцсон нь үнэн болохыг түүний өмгөөлөгчийн газар хүлээн зөвшөөрчээ. Тодруулбал, ордны хэвлэлийн албаны мэдээлснээр ханхүү тавдугаар сарын 24-ны өдөр Бельгиэс Испани руу явж, 26-ны өдөр 12, зарим эх сурвалжийн мэдээллээр 27 зочинтой арга хэмжээнд оролцсон байна.

Кордобагийн хуулийн газраас гаргасан мэдэгдэлд дурьдсанаар ханхүү “Би хорио цээрийн арга хэмжээг хүндэтгэлгүй, зөрчиж, өөр улс руу аяласандаа уучлалт хүсэж байна. Би энэ хэцүү цаг үед хэнийг ч дорд үзэж эсвэл үл хүндэтгэхийг хүсээгүй бөгөөд өөрийн үйлдэлдээ харамсаж, гаргасан үр дүнгээ хүлээн зөвшөөрч байна” хэмээн хэлжээ.

Одоогоор албаныхан ханхүүгийн оролцсон арга хэмжээнд 15-аас дээш хүн байсан эсэхийг мөрдөж байгаа юм байна. Тус мөрдлөгийн багийн хэвлэлийн төлөөлөгчийн мэдээлснээр Испанийн бүс нутгийн эрүүл мэндийн төвөөс өөрийн засгийн газартаа уг арга хэмжээнд оролцсон хүмүүсийн тоог 27 гэж мэдээлжээ.

Ханхүү одоогоор Ковид-19 халдварын хөнгөн шинж тэмдэгтэйгээр тусгаарлагдаж байгаа аж.

Эх сурвалж: CNN