Apple компанийн хамгийн сүүлийн загвар болох IPhone 14 загварын гар утас паркийн галзуу хулгана болон бусад хурдтай тоглоом дээр тоглож байгаа эзнээ аюулт өртлөө хэмээн тооцож, автоматаар түргэн тусламж дуудах нь ихэсчээ.

Тодруулбал, IPhone 14 загварын гар утсанд гэнэтийн осол, автомашины аваар илрүүлэх шинэ функц нэмсэн бөгөөд тус функц нь хэрэглэгчийг автомашины осолд орсон тохиолдолд цагдаа, түргэн тусламжийн 911 дугаарт автоматаар залгагдах тохируулгатай юм.

Улмаар ослын байршлыг мэдээлсэн аудио мессеж очдог аж. Apple-ийн шинэ гар утсан дахь гироскоп мэдрэгч болон хурдатгал хэмжигч төхөөрөмжүүд нь автомашины ослын үеийн хэмжээс үзүүлэлтэд хүрсэн тохиолдолд анхааруулах чимээ өгнө. Түүнийг хэрэглэгч 20 секундийн дотор идэвхгүй болгоогүй нөхцөлд 911 дугаарт автоматаар дуудлага өгч түргэн тусламжийн төвд мэдээлдэг байна. Хэдийгээр “хуурамч” дуудлага олон өгч байгаа боловч тус функц саяхан Небраскад гарсан ослын талаар амжилттай мэдээлсэн. Apple-ийн зүгээс хэрэглэгчдээ цэнгэлдэх хүрээлэнгийн тоглоомд суухаасаа өмнө тус тохируулгыг унтрааж байхыг одоогоор сануулаад байгаа юм.

Эх сурвалж: The Verge