Түлхүүр мэдээлэл:
- Эмч нар Ковид-19-өөр өвчилсөн хүмүүст сайхан сэтгэгдэл төрүүлэх үүднээс инээсэн зургаа хувцас дээрээ наах болжээ.
- Уг санааг анх Робертино гэх эмч гаргасан байна.
- Ингэснээр өвчтөнүүдэд эмч нарыг робот мэт хол хөндий санагдахаас сэргийлэх аж.
АНУ-ын Сан-Диего хотын “Scripps Mercy” эмнэлгийн ажилчид коронавирусний халдвараар өвчилсөн иргэдэд сайхан сэтгэгдэл төрүүлэхийн тулд хамгаалалтын хувцас дээрээ инээж буй зургаа наажээ.
Учир нь хамгаалалтын хувцастай ажиллах үед өвчтөнд робот мэт санагдах тохиолдол бий. Тиймээс тус эмнэлгийн эмч Робертино энэхүү санааг гаргасан аж. Тодруулбал, Робертиногийн найз коронавирусний халдвараар өвчилсөн бөгөөд түүнд өөрийгөө таниулахын тулд анх уг санааг сэджээ.
Найздаа эмчилгээ хийсний дараа тэрээр хамгаалалтын хувцастай, тусгай амны хаалттай ажиллах нь өвчтөнд ямар мэдрэмж төрүүлж байгаа талаар бодож эхэлсэн байна. Удалгүй түүнийг харсан эмнэлгийн ажилчид мөн инээсэн зургаа энгэртээ нааж эхэлжээ. Мөн бусад эмнэлгийн ажилтнууд урам зориг авч, энэхүү санааг хэрэгжүүлэх болсон байна.
Эх сурвалж:Brighthumanity
