ДЭМБ-ын Номхон Далайн Баруун Бүсийн улсуудын Эрүүл мэндийн сайд нарын цахим хурал өчигдөр боллоо. Энэхүү хурал нь Номхон Далайн Баруун Бүсийн улсуудад коронавируст халдварын нөхцөл байдал, авч хэрэгжүүлж буй арга хэмжээний талаар мэдээлэл, туршлага солилцох зорилготой бөгөөд цахим хуралд НДББ-ийн 30 гаруй улсын Эрүүл мэндийн сайд нар, удирдах албан тушаалтнууд оролцов.

Цахим хурлыг ДЭМБ-ын НДББ-ийн захирал Др.Такеши Касай удирдан явуулсан бөгөөд хурлын эхэнд ДЭМБ-ын Ерөнхий захирал Тедрос Гебрейсус, ДЭМБ-ын коронавируст халдварын Бэлэн байдал, Хариу арга хэмжээний Ерөнхий захирлын тусгай элч, Бүсийн хүндэт захирал Др. Шин Ян-су, Бүгд Найрамдах Фижи Улс, Бүгд Найрамдах Сингапур Улс, Бүгд Найрамдах Социалист Вьетнам Улсын Ерөнхий сайд нарын зүгээс коронавируст халдварын талаар өндөр түвшний илгээлт хүргэв.

Цахим хурлын үеэр Эрүүл мэндийн Дэд сайд Л.Бямбасүрэн Монгол улсын Засгийн газраас коронавируст халдварын чиглэлээр авч буй арга хэмжээ, хийж хэрэгжүүлж байгаа үйл ажиллагаа, тулгамдсан асуудлууд, түүнийг даван туулж буй туршлагаа танилцууллаа.

Мөн ДЭМБ-ын Номхон далайн Баруун Бүсийн төвөөс коронавируст халдварын нөхцөл байдлын талаарх шинэчилсэн мэдээллийг бүсийн улсуудад танилцууллаа. Япон улсын Засгийн газраас коронавирусийн халдварлалтыг даамжруулах “3C” гурван нөхцлийг нэгдүгээрт, агааржуулалт муутай битүү орон зай, хоёрдугаарт олон хүн хэт бөөгнөрсөн газар, гуравдугаарт, ойрын хавьтал хэмээн тодорхойлсон байна. Мөн Япон улс ДЭМБ-аар дамжуулан бусад улсуудад тусламж, дэмжлэг үзүүлэх талаар танилцуулав.

ДЭМБ-ын Номхон далайн Баруун Бүсийн захирал Др. Касай бүсийн улсуудын Эрүүл мэндийн сайд нар, удирдах албан тушаалтнуудад хандан коронавируст халдварын цартахлын эсрэг бүхий л хариу арга хэмжээг хичээнгүйлэн авч ажиллаж байгаад талархал илэрхийлж, цаашид хамтын хүчээр энэхүү халдварын цартахлын хүнд үеийг даван туулна гэдэгт итгэл дүүрэн байгаагаа илэрхийлснээр цахим хурал өндөрлөв.