Өмнөговь аймгийн Цогц-Цэций сумын Иргэдийн хурлын тэргүүлэгчдийн 2021 оны арванхоёрдугаар сарын 30-ны өдрийн тогтоолоор "Дархан бэр" энгэрийн тэмдэг, үнэмлэх олгохтой холбоотой журмыг батлан гаргасан олон нийтийн шүүмжлэлд өртөөд байна. Тодруулбал, анх бэр болж очсон айлдаа гурваас дээш хүү дараалан төрүүлж өсгөсөн эмэгтэйг хүндэтгэн тус сумын нэрэмжит шагнал болох "Дархан бэр" энгэрийн тэмдгийг олгох аж. Гэвч тус журамд "Охин төрүүлсэн бол дархан бэрд тооцохгүй" хэмээн заасан нь олон нийтийн шүүмжлэлийг дагуулж буй юм. Дархан, Уран бэр зэрэг хүндэтгэлийн шагналыг ТББ-ууд тодорхой зохион байгуулалтын хүрээнд олгож ирсэн байдаг. Гэвч хэдийнэ тогтсон ёс, заншил уламжлалыг төрийн байгуулалтын нэг нэгж байгууллагаас хууль, журам болгон баталсан нь хүний эрхийн маш том зөрчил болохыг олон нийт онцолж байна.