УИХ-ын Аюулгүй байдал, гадаад бодлогын байнгын хороо өнөөдөр хуралдаж Цар тахлын хуулийг сунгах эсэх талаар хэлэлцлээ. Хэлэлцэж байгаа асуудалтай холбогдуулан гишүүд асуулт асуун хариулт авлаа.

УИХ-ын гишүүн Б.Бат-Эрдэнэ "Цар тахлын хүнд нөхцөлд цахилгаан дулааны үнийг төрөөс хариуцаж байгаа нь иргэд, ААН-үүд рүүгээ чиглэсэн үр дүнтэй ажил болж байгаа. Үүнийгээ үргэлжлүүлэх талаар Засгийн газар хэлэлцэж байгаа юу" гэж асуулаа.

Шадар сайд С.Амарсайхан "Айл өрхийн тог цахилгааны хөнгөлөлттэй холбоотойгоор орон сууцны айл өрхийн 250 кВт хүртэл, гэр хорооллын айл өрхийн 350 кВт хүртэл төлбөрийг хөнгөлөх асуудал Засгийн газарт яригдаж шийдвэрлэгдэхээр явж байгаа" гэв.

Байнгын хорооны хуралдаанд оролцсон гишүүдийн олонх хуулийн төслийн үзэл баримтлалыг дэмжиж, чуулганы нэгдсэн хуралдаанаар хэлэлцүүлэх нь зүйтэй гэж үзлээ.