Шөнийн цагаар жолоо барьж яваад осол гаргаж, амиа алдсан хэрэг гарчээ. Тодруулбал, Хэнтий аймгийн Жаргалтхаан сумын Баян-Эрдэнэ багийн нутаг “Хамар даваа” гэдэг газарт /аймгийн төвөөс баруун хойд зүгт 123 км, сумын төвөөс баруун хойд зүгт 23 км/-т 09.11-ний өдрийн 23:00 цагийн орчим Сүхбаатар аймгаас Улаанбаатар хотын чиглэлд зорчиж явсан Улаанбаатар хотын харъяат иргэн С-ийн 64-65 Норд Бенз загварын ачааны автомашин осолдож, автомашины төмөр хийцэд иргэн Б /34 настай, эрэгтэй/ хавчуулагдан нас барсан байна. Дуудлагын дагуу аймгийн Онцгой байдлын газрын дарга, хурандаа Ж.Эрдэнэбатаар ахлуулсан алба хаагчид 01:05 цагт осол болсон газарт ажиллажээ. Иймд иргэд шөнө үдшийн цагаар жолоо барихдаа болгоомжтой байхыг анхааруулж байна.
