Шинэ коронавирусийн халдвараас урьдчилан сэргийлэх ажлын хүрээнд Засгийн газраас хүсэлт тавьсны дагуу Азийн хөгжлийн банк 4.2 тэрбум төгрөгийн тоног төхөөрөмж нийлүүлэхээр болсон.
Тэгвэл эхний тоног төхөөрөмжүүд өнөөдөр ирж байгаа талаар АХБ-ны Монгол дахь суурин төлөөлөгчийн газрын Нийгмийн асуудал хариуцсан ахлах мэргэжилтэн Ж.Алтантуяа хэллээ.
Шинэ коронавирсийн голомтын бүс болох БНХАУ-д гарсан дэгдэлтийн үеийн өвчлөлийн байдлаас үзэхэд тус вирусийн халдварын эмнэлзүйн шинж нь амьсгалын хурц дутмагшил, бөөрний дутагдалд хүргэж байгаа учир АХБ-ны 4.2 тэрбум төгрөгийн санхүүжилтээр амьсгалын болон диализын аппаратыг нэмэлтээр захиалсан талаар Эрүүл мэндийн сайд Д.Сарангэрэл мэдэгдсэн.
Тиймээс Япон, Герман зэрэг АХБ-ны гишүүн орнуудаас ирж буй есөн нэр төрлийн аппаратад богино хугацаанд оношлогч, явуулын рентген аппарат, хүүхдийн амьсгалын аппарат зэрэг багтаж байгаа бөгөөд хоёрдугаар сарын 25-н гэхэд бүх тоног төхөөрөмжийг хүлээж авах юм байна.
