Засгийн газрын хуралдаан өнөөдөр болж буй. Одоогоор хуралдаан завсарласан бөгөөд 18:00 цагаас үргэлжлүүлэн хуралдах юм байна.  Уг хурлаар "Т.Чимгээг эрүүдэн шүүсэн эсэхтэй холбоотой бичлэг, нотлох баримтыг нууцаас гаргах тухай" асуудлыг хэлэлцэх аж. Хурлаас гарсан шийдвэрийг хурлын дараа зарлана гэдгийг Засгийн газрын хэвлэл мэдээлэлтэй харилцах хэлтсээс мэдээллээ. 

Ерөнхий сайд Л.Оюун-Эрдэнэ болон ХЗДХ-ийн сайд Х.Нямбаатар нар Олон улсын эмэгтэйчүүдийн эрхийг хамгаалах өдөр 401 дүгээр хорих ангид очиж С.Зоригийн хэрэгт буруутгагдан ялаа эдэлж буй Т.Чимгээтэй уулзсан билээ. Энэ үеэр Т.Чимгээг байцаах явцдаа эрүүдэн шүүж, хэрэг хүлээлгэсэн хэмээн мэдэгдсэн. Ингэхдээ хар тамхи судсаар нь тарьж, хувцсыг нь тайлж бичлэг хийгээд нөхөрт нь үзүүлсэн зэргээр ярьсан билээ. Тэгвэл Ерөнхий сайдын ярьсныг батлах бичлэг зэргийг нууцаас гаргах эсэх талаар хэлэлцэхээр болжээ.