Ерөнхий сайд асан, УИХ-ын гишүүн Л.Оюун-Эрдэнэ NTV телевизийн "Лхагвын тойм" нэвтрүүлэгт оролцох үеэрээ ХЗДХ-ийн сайд Б.Энхбаярыг "Бодь групп"-ээс 500 мянган ам.долларын хандив авсан гэх мэдээллийг дэлгэсэн юм.

Улмаар энэхүү асуудлыг АТГ-т өгч шалгуулна гэж мэдээлсэнийхээ дагуу өнөөдөр АТГ-т хүсэлтээ өглөө. Энэ үеэрээ тэрбээр "Б.Энхбаяр цагдаагийн алба хаагчдын цалингийн үлдэгдлийг уяач Б.Нямжав руу шилжүүлсэн. Б.Нямжав бол Я.Содбаатар даргын ойрын найз. Нийт 5 орчим тэрбум төгрөгийг авч, тараалт хийсэн. Энэ их мөнгөөр Арцатын аманд орон сууц авсан байна. Хувь эзэмшил дунд нь Б.Энхбаяр бий. Мөн Ланд-300 автомашин авч ХОМ-тээ тусгахгүй одоог хүртэл унаад явж байна.

Б.Энхбаяр ҮАБЗ-ийн дотоод нууцлалтай холбоотой төсвийг мэддэг Тусгай хяналтын дэд хороог давхар хариуцаж байгаа нь ХУУЛИАР ХОРИОТОЙ. Равдангийн Болдтой холбоотой ХУУЧИН нисдэг тэргийг ҮАБЗ-ийн НБД А.Бямбажаргал тэргүүтэй нөхөдтэй Б.Энхбаяр тохиролцон шинэ баримт бүрдүүлж худалдан авсан. Б.Энхбаяр нь авлига, хуйвалдаанаа өөрийн хамтран зүтгэгч ХЗДХ-ийн дэд сайд Д.Мөнх-Эрдэнэтэй хамтран зохион байгуулсан байж болзошгүй байна" гэсэн юм.

Харин уг мэдээллийн дараа ХЗДХ-ийн сайд Б.Энхбаяр хэвлэлийнхэнд мэдээлэл өглөө.