Өнгөрсөн 2024 оны нэгдүгээр сарын 23-24-нд шилжих шөнө БЗД-ийн нутаг дэвсгэр, Дүнжингарав худалдааны төвийн урд замд газ тээвэрлэж явсан ачааны машин суудлын автомашинтай мөргөлдсөний улмаас гал гарч дэлбэрэлт үүсэн, их хэмжээний хохирол учирсан байдаг. Дэлбэрэлтийн улмаас энгийн иргэн, онцгой байдлын алба хаагчид гээд нийт долоон хүн амиа алдаж, замын ойролцоох 207 дугаар байр шатаж оршин суугчид нь орон гэргүй болсон юм.

Үүнээс хойш нэг жил хагасын хугацаанд тухайн байрыг хэзээ буулгах нь тодорхойгүй, оршин суугчид нь хэдий болтол түрээсийн байр хэсэх нь бүрхэг байлаа. Тэгвэл тухайн орон сууцыг өнөөдрөөс эхлэн буулгаж байна. Буулгах ажил ирэх аравдугаар сарын 10-нд дуусах юм байна.