Монгол Улс, ОХУ-ын Зэвсэгт хүчний хамтарсан “Сэлэнгэ-2025” байлдааны буудлагатай хээрийн сургуулийн хүрээнд Монгол Улсыг сурталчлах соёл, спортын өдөрлөг 08 дугаар сарын 22-ны өдөр зохион байгуулагдаж байна. Монгол Улсын талаас соёлын өдөрлөгт зориулж үндэсний бөх, сур харваа, ЦДБЭЧ-ын уран бүтээлчдийн тоглолт, монгол бичгээр нэрийг нь сийлж дурсгах үйлчилгээ, үндэсний зоог бэлтгэхийн сацуу хоёр орны цэргийн алба хаагчдын нөхөрлөлийг улам бэхжүүлж, танилцуулах хүрээнд ПМ болон СВД буудлага, 5 км-ийн гүйлт, гар барилдаан, олс таталт, шатар, даам олон хөтөлбөрийг бэлтгэв.
Яг одоогийн байдлаар үдээс өмнө олс таталт, 5 км-ийн гүйлт, буудлагын тэмцээнүүд амжилттай явагдаад байна. Хоёр орны цэргийн алба хаагчид өрсөлдөхөөс илүү хамтдаа холимог баг болон оролцсноороо онцлог бөгөөд 5 км-ийн гүйлтэд гэхэд нэг багт таван Монгол, таван Орос дайчид буутайгаа, нийт 4 баг гүйж, амжилттай бариалав. Бариалахдаа монгол дайчид нөхдийнхөө бууг үүрч, гараас нь дэмжиж, хөтөлж гүйсэн нь үзэгчдийн талархлыг хүлээж байсан юм.
