УИХ-ын 2024 оны ээлжит сонгуулийн дүнд байгуулагдсан анхны 126 гишүүнтэй ес дэх удаагийн парламентын хаврын чуулган нээлтээ хийлээ. Энэ удаагын чуулганаар гишүүдийн ирцийн тогтмол мэдээлж, сайжруулахад анхаарна гэдгээ УИХ-ын дарга Д.Амарбаясгалан чуулганы индэр дээрээс мэдэгдсэн юм.

Тэгвэл өнгөрөгч 2024 оны 10-р сарын 01-ний өдөр эхэлж, 2025 оны 01 дүгээр сарын 24 хүртэл үргэлжилсэн намрын ээлжит хуралдааныг таслалтаараа тэргүүлж, "сануулах" арга хэмжээ авахуулах болзлоо хангасан УИХ-ын гишүүн Х.Баттулга, С.Лүндэг нар чуулганы хуралдаанд оролцлоо. С.Лүндэгийн хувьд эрүүл мэндийн шалтгааны улмаас хуралдаанд сууж чадаагүй тул хаврын чуулганд идэвхтэй оролцоно хэмээн сонгогчдоос уучлалт гуйгаад амжсан. Харин Х.Баттулгын хувьд тодорхой шалтгаанаа тайлбарлаагүй хэвээр. Ямартай ч гишүүд хаврын чуулгандаа хэр идэвхтэй оролцохыг харах үлдлээ.