МҮХАҮТ-ын захирал асан Т.Дүүрэнг саяхан сулласан бөгөөд хоригдох хугацаанд нь түүний албан тушаалд шинэ Гүйцэтгэх захирал томилсон. Шинэ Ерөнхийлөгчөөр "Транспаренси интернешнл Монгол" ТББ-ын тэргүүн Л.Төр-Од сонгогдсон билээ.

Тэгвэл Т.Дүүрэн танхимын шинэ удирдлагатай уулзаж ажлаа хүлээлцэн өгсөн талаараа мэдэгдэж Л.Төр-Одыг дэмжиж ажиллахаа илэрхийллээ. Тэрбээр "Танхимынхаа шинэ удирдлагатай ажлаа хүлээлцэж өглөө. Үс ноосоо тушаачихлаа. Оюутан цагаасаа нөхөрлөсөн Төр-Од андыгаа дэмжиж ажиллана. Танхим хараат бус, залгамж халаатай, бие даасан, өөрийн гэсэн уламжлал ба тогтолцоотой чухал байгууллага" гэжээ.

Т.Дүүрэнг өнгөрсөн оны арваннэгдүгээр сарын 27-нд 30 хоногийн хугацаатай баривчилсны маргааш нь МҮХАҮТ-ын шинэ Ерөнхийлөгчийг сонгох хурал болсон юм. Ерөнхийлөгчийн сунгаанд "Урбанек" компанийн захирал Б.Лхагважав, "Транспаренси интернешнл Монгол" ТББ-ын тэргүүн Л.Төр-Од, Швейцарийн Холбооны Улсаас Монгол Улсад суух Өргөмжит консул, эдийн засагч Б.Лакшми, "Таванбогд групп"-ийн ерөнхийлөгч "Ц.Баатарсайхан нар оролцсон бол цагдан хоригдсон Т.Дүүрэн бие төлөөлөгчөөрөө дамжуулан видео бичлэгээр мөрийн хөтөлбөрөө танилцуулж, үүссэн нөхцөл байдлын талаар тайлбар хийж байв. Түүнийг энэ оны хоёрдугаар сард сулласан юм.