Хэрэглээний сагсыг тодорхойлдог инфляц нэгдүгээр сард 9.6 хувиар өссөн дүнтэй гарлаа. Нэгдүгээр сард Улаанбаатар хотын хэрэглээний сагсны 404 нэрийн бараа, үйлчилгээний 192 нь буюу 47.5 хувь нь өмнөх сараас өссөн байна. Өөрөөр хэлбэл, хэрэглээний сагсанд байгаа бараа, үйлчилгээний тэн хагас нь нэмэгдсэн гэсэн үг. Үүнд, өдөр тутмын өргөн хэрэглээний хүнс болох, мах, талх, гурилнаас авхуулаад ундаа, ус, хувцас бөс барааны үнэ нэмэгдсэн нь үнийн өсөлтөд жин дарж байна. Харин хэрэглээний сагсны 28.5 хувь буюу 115 нэр төрлийн бараа үйлчилгээний үнэ өөрчлөлтгүй гарчээ.
