Парисын паралимпын наадам үргэлжилж байна. Өчигдөр байт харвааны төрөл эхэлсэн бөгөөд Монгол Улсаа төлөөлөн Д.Сэлэнгээ, Б.Оюун-Эрдэнэ нар өрсөлдөв. Чансаа тогтоох урьдчилсан харваанд Д.Сэлэнгээ 622 оноо авч, гуравдугаар байрт бичигдсэн бол Б.Оюун-Эрдэнэ 524 оноотой, 18 дугаар байрт бичигджээ. Улмаар өндөр оноо авсан Д.Сэлэнгээ эхний тойрогтоо гоц мөргөсөн бол Б.Оюун-Эрдэнэ эхний тойрогтоо Италийн Вероника Флоренотой учраа таарав.
Д.Сэлэнгээ хоёрдугаар тойрогтоо Украины Анна-Виктория Шевченкотой учраа таарч, 6-2 харьцаатай ялжээ. Харин дараагийн тойрогтоо Словенийн Зива Лавринчтай учраа таарч 6-4 харьцаатай ялж, хагас шигшээд шалгарсан юм.
Тэгвэл Б.Оюун-Эрдэнэ эхний тойрогтоо Италийн Вероника Флореног ялсан ч дараагийн тойрогтоо Хятадын Вү Чүнянд ялагджээ. Ийнхүү Д.Сэлэнгээ хагас шигшээд Хятадын Вү Чүнянтай цэц мэргэнээ зорьж, 4-6 харьцаатай ялагдсанаар хүрэл медалийн төлөө харвахаар болсон. Гэвч хүрэл медалийн төлөөх харваанд Италийн Элизабетта Мижно 6-2 харьцаатай ялжээ.
Токиогийн паралимпод оролцож мөн ДАШТ-ээс хүрэл медаль хүртэж байсан Д.Сэлэнгээ паралимпод дөрөвдүгээр байр эзэллээ. Энэ төрлийн алт, мөнгөн медалийг Хятадын тамирчид болох Вү Чүнян, Вү Ян нар хүртсэн юм.
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!