“Эрдэнэс-Тавантолгой” ХК энэ сард 1.3 сая тонн нүүрс борлуулсан нь өмнөх сараас гурав дахин өссөн үзүүлэлттэй байна.

Гуравдугаар улирлын байдлаар 4.9 сая тонн нүүрсийг уурхайн амнаас ачуулсны 61 хувь буюу 3 сая тонн нүүрсийг Цанхийн зүүн уурхайгаас, 39 хувь буюу 1.9 сая тонн нүүрсийг Цанхийн баруун уурхайгаас ачуулаад байна. "COVID-19" цар тахлын дэгдэлтээс үүдсэн хилийн хориотой холбоотойгоор 4-6 дугаар сард нүүрс борлуулалтын хэмжээ огцом багассан ч Монгол, БНХАУ-ын хилийн боомтын “Ногоон гарц”-ыг хэрэгжүүлэх түр журмын үр дүн, нүүрсний борлуулалтыг хэвийн тасралтгүй үргэлжлүүлэх тухай удирдамжийн хүрээнд энэ оны борлуулалтын орлогын 50 хувийг зөвхөн 7-9 дүгээр сард олжээ.

“Эрдэнэс-Тавантолгой” ХК-ийн хамт олон есдүгээр сарын 24-ний  07:00 цагаас 25-ны өдрийн 07:00 цаг хүртэл 1205 тээврийн хэрэгслийн 1310 тэвшинд 91 мянга 328.55 тонн нүүрс ачиж гаргасан нь энэ оны өдрийн ачилтын дээд үзүүлэлт гэдгийг “Эрдэнэс-Тавантолгой” ХК мэдээллээ.