2024 оны УИХ-ын ээлжит сонгууль өчигдөр болж, дүнгээ танилцуулсан билээ. Тэгвэл шинээр бүрэлдэх парламентын зарим сонин хачнаас та бүхэнд хүргэж байна.
Шинэ парламентад сонгогдсон 126 гишүүний дунд сэтгүүлч мэргэжлээр их, дээд сургууль төгссөн 4 хүн байгаа юм. Эдгээрийг танилцуулбал,
Монгол Улсын Ерөнхий сайд Л.Оюун-Эрдэнэ 2001 онд "Бэрс" дээд сургуулийг сэтгүүлч мэргэжлээр төгсөж байжээ. Дараа нь 4-р тойрогт нэр дэвшиж, ялалт байгуулсан одоогийн БШУ-ны сайд Л.Энх-Амгалангийн хувьд сэтгүүлч мэргэжил эзэмшиж, 1992-1995 онд МОНЦАМЭ агентлаг, "Ил товчоо" сонины хариуцлагатай нарийн бичгийн даргаар ажиллаж байв.
Түүнчлэн 7-р тойрог буюу говийн бүсэд АН-аас нэр дэвшиж, суудал авсан "Цензургүй яриа"-ны гэгддэг Л.Мөнхбаясгалан багтлаа. Тэрбээр 1997-1998 онд Хэвлэлийн хүрээлэнг дүүргэжээ.
Дөрөвдүгээрт, "Улаан бал"-ын гэх тодотголтой сэтгүүлч Ч.Лодойсамбуу 12-р тойрогт АН-аас нэр дэвшиж, ялалт байгуулаад байна. Тэрбээр 2005-2009 онд "Хэвлэлийн хүрээлэн"-ийн дэргэдэх Сэтгүүлч коллежид сурч, төгсөж байжээ.
