Зургийн тайлбар: Бүгд Найрамдах Солонгос Улсаас Монгол Улсад суугаа  Элчин сайд Ли Ё Хун, ХНХ-ын сайд А.Ариунзаяа нар.

Бүгд Найрамдах Солонгос Улс, Монгол Улс 1990 онд дипломат харилцаа тогтоосноос хойш  хамтын ажиллагааг өргөжүүлэх хүрээнд манай яам  Солонгосын Эрүүл мэнд халамжийн яамтай харилцан ойлголцлын санамж бичиг байгуулсан. Энэ хүрээнд нийгмийн хамгааллын салбарын боловсон хүчнийг чадавхжуулах сургалтыг 2017, 2018 онд Сөүл хотноо зохион байгуулж, 20 албан хаагчдыг хамруулсан билээ.

Ковид цар тахлын онцгой нөхцөл байдал үүссэн ч хамтын ажиллагааны хүрээнд зохион байгуулах сургалтаа тасалдуулахгүйгээр цахимаар үргэлжлүүлэхээр болжээ. Сургалтад зориулж Солонгосын Эрүүл мэнд халамжийн яамнаас ирүүлсэн таблетыг Бүгд Найрамдах Солонгос Улсаас Монгол Улсад суугаа онц бөгөөд бүрэн эрхт Элчин сайд Ли Ё Хун, Хөдөлмөр, нийгмийн хамгааллын сайд А.Ариунзаяад хүлээлгэн өглөө.

Энэхүү сургалт нь нийгмийн хамгааллын салбарын боловсон хүчний чадавхыг бэхжүүлэхэд чухал ач холбогдолтой тул хоёр тал цаашид үргэлжлүүлэн зохион байгуулах асуудлаар хамтарч ажиллахад бэлэн байгаагаа илэрхийллээ.

Эх сурвалж: ХНХЯ