Засгийн газраас хэрэгжүүлж буй “Шинэ хоршоо хөдөлгөөн”-ий хүрээнд “Шинэ хоршоо-Чинээлэг малчин” арга хэмжээний санхүүжилтийг Монголбанкнаас шийдвэрлэсэн. Мал аж ахуйг дэмжих зорилготой уг төсөл нь таван жилийн хугацаанд 5 их наяд төгрөгийн зээлийг арилжааны 7 банк хоршоогоор дамжуулан малчдад 6 хувийн хүүтэй олгох юм. Үүний эсрэг байр суурийг “Малчдын холбоо” ТББ-аас өнөөдөр илэрхийлэв. Тус холбооны тэргүүн Э.Пүрэвсүрэн “Шинэ хоршоо хөтөлбөрт малчид хамрагдаж болно. Хүн мөнгө өгнө гэж байгаа дээр авах хэрэгтэй. Хамгийн гол нь 5 га газрыг үнэгүй олгоно. Хашаалбал одоогийн Өвөр Монгол шиг болно.

Малчдад зээл өгч, өөрсдөөр нь газар нутгийг хашаалуулж нүүдэлчин ахуйг устгах нь. Үүнд малчид та бүхэн бодолтой хандаарай гэж хүсэж байна. 5 их наяд төгрөгийн зээл олгох нь өртэй малчдын өр л нэмэгдэнэ. Иймээс 5 их наядын зээлээс илүү зээлээ тэглүүлэх нь чухал.

Аль эсвэл 5 их наяд төгрөгөөр мал аж ахуйн гаралтай бүтээгдэхүүн боловсруулах үйлдвэрлэл барих нь зөв. Бид хоршоо болж хамтарсан ч бидний бүтээгдэхүүнийг нийлүүлэх зах зээл байхгүй шүү дээ” гэв.