Дөрөвдүгээр сарын 17-нд Чингэлтэй дүүргийн 13 дугаар хороонд Хайлаастын өрхийн эмнэлгийн урд 18:40 цагийн орчимд Prius, Verna хоёр автомашин мөргөлдсөний улмаас замаар гарч явсан 16 настай охин осолд өртөж нас барж, 6 хүүхэд нэг том хүн гэмтсэн осол гарсан. Ослын улмаас амиа алдсан охин эхээс гурвуулаа, айлын бага охин байсан бөгөөд дээрээ нэг ах, нэг эгчтэй. Гэвч төрсөн эгч болох 26 настай эмэгтэй, түүний 9 настай хүү, төрсөн ахынхаа 12 настай хүүхэдтэй хамт осолд өртсөн байдаг. Өөрөөр хэлбэл, нэг айлын дөрвөн хүн уг осолд өртөж, 16 настай охин газар дээрээ нас барсан юм.

Тиймээс хүүхдүүдийн ар гэрээс өнгөрсөн долоо хоногт хандивын аян зарласан бөгөөд одоогийн байдлаар нийт 36 сая орчим төгрөг цугларчээ. Мөн эмнэлэгт ухаангүй байсан 26 настай эмэгтэй ухаан ороод байгаа билээ.