УОК-оос цаг үеийн асуудлаар мэдээлэл өглөө. Энэ үеэр Ус цаг уур, орчны шинжилгээний газрын ахлах мэргэжилтэн О.Оюунчимэг зудын нөхцөл байдлын талаар мэдээлэл өглөө. Тэрбээр, "Мөсөн зуд 6 аймгийн 20 суманд, цагаан зуд 16 аймгийн 85 суманд, цагаанаар зудархуу нь 12 аймгийн 41 суманд байна. Энэ сарын 20-ны өдрийн байдлаар нийт нутгийн 50 гаруй хувьд цасан бүрхүүлтэй. Өнгөрсөн 10 хоногт 10 хувиар буурсан үзүүлэлттэй байгаа. Цаашдын цаг агаарын төлөвийг танилцуулахад, өнөөдөр буюу 22-нд баруун, төв, зүүн аймгуудын нутгийн хойд хэсгээр, 23-нд Хангай, Хөвсгөлийн уулархаг нутгаар, 24-нд Хэнтийн уулархаг нутгаар, 25-нд баруун болон төвийн аймгуудын нутгийн өмнөд хэсгээр, 26-нд Увс нуурын хотгор, Алтай, Хангай, Хөвсгөлийн уулархаг нутаг, Дарьгангын тал нутгаар, 27-нд Хэнтийн уулархаг нутаг, Хэрлэн, Онон, Улз, Халх голын хөндийгөөр, 28-нд төв болон зүүн аймгуудын нутгийн зарим газраар, 29-нд зүүн аймгуудын нутгийн зүүн хэсгээр цас орж, зөөлөн цасан шуурга шуурна.

Салхины хувьд энэ сарын 23-нд тал, хээрийн нутгаар, 24-нд Алтайн салбар уулсаар, 25-нд говь, тал, хээрийн нутгаар секундэд 12-14 метр, 26-нд баруун аймгуудын нутгаар, 27-нд нутгийн зүүн хагаст, 28-нд говь, тал, хээрийн нутгаар секундэд 16-18 метр хүрч ширүүсч шороон шуурга шуурна" гэлээ.