Баянзүрх дүүргийн 26 дугаар хороо Дүнжингаравын уулзварт 60 тонн газ ачсан автомашин, патрол маркийн машинтай шүргэлцсэний улмаас гал гарч, галыг унтраахаар ажиллаж байсан 3 алба хаагч амиа алдсан.
Мөн 60 айлын орон сууц галд өртөж, 10 түлэгдэн эмнэлгийн тусламж авч байсны хоёр нь эмчилгээний явцад амьсгал хураасан.
Бид ГССҮТ-өөс эмнэлэгт хэвтэн эмчлүүлж буй иргэдийн биеийн байдал ямар байгааг тодруулахад, "Өнөөдрийн байдлаар, ГССҮТ-ийн Салбар эмнэлгийн Эрчимт эмчилгээний тасагт биеийн байдал маш хүнд буюу амьсгалын аппаратын тусламжтайгаар эрүүл мэндийн тусламж үйлчилгээ авч байгаа 2 үйлчлүүлэгч байна. Тус тасагт хэвтэн эмчлүүлж байсан 2 хүнийг ар гэрийнхнийх нь хүсэлтээр гадаад улс руу эмчилгээнд явуулсан. Мөн тус салбар эмнэлгийн Түлэгдлийн төвийн тасагт биеийн байдал дунд 3 үйлчлүүлэгч байна. Нэг үйлчлүүлэгчийн биеийн байдал тогтворжиж, эмнэлгээс гарсан байна" гэлээ.
