Баруун өмнөд Англи дахь Бристол хотод нэгэн залууг “ни**ер новш” хэмээн машинаар дайран зугтаасан хэрэг гарсан ба уг үйл явдлыг BBC мэдээллэх үеэрээ мөн л “ни**ер” хэмээх үгийг ашиглажээ.

Уг үйл явдлын дараа олон зуун гомдол BBC-д ирсэн бөгөөд тус Британийн нэвтрүүлэгч олон нийтийн дунд эмх замбараагүй байдал үүсгэсэндээ харамсаж буйгаа илэрхийлсэн байна. 

Энэ талаар ВВС-ийн ерөнхий эрхлэгч Лорд Энтони Холл өмөөрөх хандлагатайгаар “ВВС тус халдлагын талаар мэдээллэхдээ яг ямар үйл явдал болсныг онцлохын тулд тус үгийг хэлсэн нь ойлгомжтой. Энэ бол ВВС мэдээллэх ёстой сэтгүүл зүйн чухал хэсэг бөгөөд үүнийгээ ч бид үргэлжлүүлсээр байх болно” хэмээн бүх ажилчиддаа и-мэйл бичсэн байна.

Гэсэн ч тэрээр сүүлд нь залруулга хийн “ВВС мэдээнийхээ үеэр өөр хандлагатайгаар ажиллах ёстой байсныгаа бид хүлээн зөвшөөрч, уучлалт хүсч байна. Мөн үүнээс цааш бид бүхэн үг, хэллэг дээрээ илүү их анхааран ажиллах болно” хэмээжээ.

Мөн ВВС уг үгийг ашигласныгаа сэтгүүл зүйн үндэслэлтэйгээр ашигласан хэмээн өөрсдийгөө зөвтгөсөнийг хүлээн зөвшөөрөөгүй BBC 1Xtra Радиогийн хөтлөгч, DJ Sideman ажлаасаа гарч буйгаа мэдэгдсэн байна. 

Эх сурвалж: Al Jazeera