Засгийн газраас өргөн барьсан цахим шилжилттэй холбоотой 120 хуулийн нэмэлт, өөрчлөлтийн төслийг Инновац, цахим бодлогын байнгын хороо УИХ-ын чуулганы нэгдсэн хуралдаанаар хэлэлцүүллээ.

Нийгэм эдийн засгийн бүх салбарт мэдээллийн технологийн дэвшлийг ашиглан, цахим хэлбэрээр, хялбар, ухаалаг шийдлээр үйл ажиллагаагаа явуулах боломжийг эдгээр хуулийн өөрчлөлтөөр нээх зорилготой гэж байнгын хорооны дарга Э.Батшугар онцлов.

Нийтийн мэдээллийн ил тод байдлын тухай хуульд төр өөрт байгаа мэдээллийг иргэнээс дахин шаардахгүй гэж заасан ч салбарын хуулиуд дээр заавал цаасан суурьтай бичиг баримтыг шаардсан байдаг нь хоорондоо уялддаггүй, иргэнээс иргэний үнэмлэхийн хуулбар нэхсэн хэвээр байгаа байдлыг тодорхой хуулиудын нэмэлт, өөрчлөлтөөр мөн шийдвэрлэж байгаа аж. Энэ мэтчилэн цахим шилжилтийн олон шинэ боломжууд эдгээр хуулийн өөрчлөлтөөр гарч байгаа юм байна. УИХ-ын чуулганы хуралдаанаар хуулийн төслүүдийн эхний хэлэлцүүлгийг хийж эцсийн хэлэлцүүлэгт бэлтгэхээр боллоо.