Нүүрсний сонсголын эхний шатны сонсгол /2023.12.06/ гурав дахь өдрөө Төрийн ордонд үргэлжилж байна. Сонсголоор Эрдэнэс Тавантолгой ХК-ийн үүсгэн байгуулагдсанаас хойшхи үйл ажиллагаа, санхүүгийн мэдээллийн талаар сонсож байна. Шинжээч энэ үеэр "ТИ ТИ ЖИ ВИ СИ ӨҮ" ХХК-д 79 тэрбум төгрөгөөр худалдан авсан машин механизм тоног төхөөрөмжөө данс бүртгэлээс хасаж ашиглуулахаар шилжүүлсэн талаарх баримтыг танилцуулсан. Үүнтэй холбогдуулан УИХ-ын гишүүн Г.Ганболд "Олон улсын тендерт шалгарч ирсэн компани нь нэг ч техникгүй, ганц тамгатай л ирсэн юм байна. Тэгээд ЭТТ 79 тэрбумаар авсан техникээ оператортой нь, ажилчидтай нь өгчээ. Энийг эрүүл ухаанаар ойлгоход төвөгтэй юм" гэхэд "Эрдэнэс Тавантолгой" ХК-ийн анхны гүйцэтгэх захирал Б.Энэбиш "Бид ажилчдаа тэр компанийн далбаан дор ажиллуулахаас өөр сонголт байхгүй. Энэ бол манай талаас хожоотой зүйл болсон. Бид үргүй зардал ч гаргаагүй" гэх хариултыг өгсөн юм.