Хүйтэн сэрүүний улирал эхлэхээр томуу, томуу төст өвчний тархалт эрчимжиж, эмнэлгүүдийн орны ачаалал, хүлээгдлийг нэмэгдүүлдэг. Энэ жил ч мөн адил эмнэлгүүдийн ачаалал нэмэгдсэн тухай мэдээлэл цахим орчинд цацагдсан. Нэмээд БНХАУ-д амьсгалын замын халдвар нэмэгдэж байгаа талаар мэдээлэл ч цацагдаж эхэллээ. Үүнтэй холбоотойгоор эмнэлгүүдийн орны ачаалал ямар байгаа. Хэрэв БНХАУ-д тархсан уушгины хатгаа манай улсад эрчтэй тархвал орны ачаалал хэрхэх талаар ХӨСҮТ-ийн ерөнхий захирлын албан үүргийг хавсран гүйцэтгэгч Ж.Байгалмаагаас тодруулахад, "Томуу, томуу төст өвчний улиралчлал эхлэхтэй зэрэгцэж эмнэлгийн орны хуваарлалтыг хийдэг. COVID 19 цар тахлыг үед бид бүх эмнэлэгт шаардлагатай ор дэлгэлтүүдийг хийгээд эмнэлэгт хэвтэх шаардлагатай бүх хүнийг авч байсан. Энэ төрлийн зохицуулалтыг хийгээд явна. Одоогийн байдлаар ор дүүрсэн, ачаалал нэмэгдсэн гэх мэдээлэл алга байна" гэлээ.