Засгийн газрын өнөөдрийн хуралдаанаар Эдийн засаг, хөгжлийн яамыг нүүлгэн шилжүүлэх асуудлыг шийдвэрлэсэн байна. Тодруулбал тус яам одоогоор Засгийн газрын II байранд үйл ажиллагаагаа явуулж байгаа бол цаашид Засгийн газрын XI байрны 1-6 давхарт шилжүүлж, нүүлгэн шилжүүлэх, засвар үйлчилгээ хийх зардлыг батлагдсан төсөвтөө багтаан шийдвэрлэхийг Эдийн засаг, хөгжлийн сайд Ч.Хүрэлбаатарт даалгажээ.

Эргэн сануулахад, Эдийн засаг, хөгжлийн яамыг өмнө нь Хууль зүйн үндэсний хүрээлэнгийн байр руу нүүлгэх асуудал яригдаж, холбогдох хүмүүсийн шүүмжлэлийг дагуулаад байсан юм. Энэ тухай эдийн засаг, хөгжлийн сайд Ч.Хүрэлбаатар мэдээлэхдээ "Энэ тэнд нь панер хадсан өрөөнд бид үйл ажиллагаагаа явуулж байна. Цаашид яамны байрны асуудлыг ЗГХЭГ-аас нэн даруй шийдвэрлэх шаардлагатай байна." хэмээсэн байдаг.