ОХУ-Украины дайнаас сөрөг нөлөө манай улсад шууд тусч буйн нэг илрэл нь шатахууны үнийн өсөлт. Манай улсын хувьд энэ төрлийн бүтээгдэхүүн ОХУ-аас 100 хувийн хараат байдаг. Тиймээс энэ хараат байдлыг бууруулж, дотоодын хэрэгцээний тодорхой хувийг бүрдүүлэх үүднээс Газрын тос боловсруулах үйлдвэрийг барьж байгуулах ажлыг Энэтхэгийн Засгийн газрын хөнгөлөлттэй эхлүүлээд буй. Үйлдвэрийн ашиглалтад орох хугацаа 2021 он гэж анх тооцоолж байсан ч улстөр болоод зарим гадаад хүчин зүйлээс болж 2024 он болж хойшлоод байсан. Тэгвэл энэ хугацаа дахин хойшилжээ. Тодруулбал, УУХҮЯ-ны дэд сайд О.Батнайрамдал мэдээлэл хийх үеэр үйлдвэрийг 2025 он гэхэд бүрэн ашиглалтад оруулж, дотоодын шатахууны хэрэглээний 55-60 хувийг хангана гэж мэдээллээ.