Хөгжлийн банкнаас зээл авсан улс төрчидтэй тэмцэж, шат дараалсан хариуцлагын асуудлыг ярина гэдгийг МАН мэдэгдээд буй. Ингэхдээ МАН-ын Хяналтын ерөнхий хорооноос Хөгжлийн Банктай нэр холбогдсон Г.Дамдинням, Г.Амартүвшин, Х.Ганхуяг тэргүүтэй найман гишүүнд тайлбар ирүүлэхийг үүрэг болгоод байсан. Албан шаардлага явуулсан хугацаанд тухайн гишүүд тайлбараа ирүүлсэн эсэхэд МАН-ын Хяналтын ерөнхий хорооны дарга Б.Баярбаатар “Нэр бүхий найман гишүүн тайлбараа ирүүлсэн. Хяналтын ерөнхий хороо удахгүй хуралдаж, тайлбаруудтай холбоотой асуудлыг хэлэлцэх юм. Эдгээр хүмүүс хууль хяналтын байгууллагаар гэм буруутай эсэхээ шийдүүлэх болж байна. Хэрвээ гэм буруутай нь тогтоогдвол хариуцлагын асуудлыг бид нэн даруй хэлэлцэнэ” гэв.
