2022 онд дэлхий даяар зохион байгуулагдах онцлох үйл явдлуудыг хүргэж байна. Үүнд дэлхийн улс орнуудын ерөнхийлөгчийн сонгууль, томоохон урлаг, спортын үйл явдлууд болон ойн баярууд зэрэг багтаж байгаа юм.
Италийн Ерөнхийлөгчийн сонгууль 2022 оны нэгдүгээр сарын 4-нд болно. Бүгд Найрамдах Улсын Ерөнхийлөгчийг Италийн парламент болон бүс нутгийн төлөөлөгчдөөс сонгоно. Одоогийн Ерөнхийлөгч Сержио Маттарелла 2015 онд сонгогдсон бөгөөд бүрэн эрхийнхээ хүрээнд дахин сонгуульд өрсөлдөх боломжтой хэдий ч өрсөлдөхөөс татгалзсан байна.
“Бээжин 2022” өвлийн олимпын XXIV наадмыг хоёрдугаар сарын 4-20-нд зохион байгуулна. Өвлийн олимпын наадмын мөсөн спортын төрлүүд Бээжин хотноо, цасны төрлийн тэмцээн уралдаанууд Жанчхүү /Жан-зя-коу/-д болох юм. Харин паралимпын наадам нь гуравдугаар сарын 4-13-нд болно.
Их Британийн Хатан хаан II Елизабет хоёрдугаар сарын 6-нд өдөр хатан хаан болсны 70 жилийн ойгоо тэмдэглэх юм.
Египет Улс Их Британиас тусгаар тогтносны 100 жилийн ойн баяраа хоёрдугаар сарын 28-нд тэмдэглэнэ.
БНСУ-ын Ерөнхийлөгчийн сонгууль гуравдугаар сарын 9-нд болно. БНСУ-ын Үндсэн хуулийн дагуу ерөнхийлөгчийн бүрэн эрхийн хугацаа нь зөвхөн таван жилээр хязгаарлагддаг буюу одоогийн ерөнхийлөгч Мүн Жэ Инийн бүрэн эрхийн хугацаа энэ өдөр дуусах юм.
Дональд Трамп 2022 оны эхний улирлын эцэс гэхэд буюу гуравдугаар сарын 31-ний дотор гэхэд өөрийн шинэ сошиал медиа платформоо ашиглалтад оруулах төлөвлөгөөтэй байгаа аж. Өнгөрсөн оны нэгдүгээр сард Капитолд болсон үймээний улмаас Трампын твиттер хаягийг эрхийг цуцлаад байгаа билээ. Тиймээс тэрбээр твиттер болон бусад цахим платформуудтай өрсөлдөхүйц сошиал медиа платформ бүтээх талаараа амлалт өгөөд байгаа юм.
2022 оны Францын ерөнхийлөгчийн сонгуулийн эхний шат дөрөвдүгээр сарын 10-нд болно. Одоогийн ерөнхийлөгч Эммануэль Макрон нь 2017 оны сонгуульд ялалт байгуулж Ерөнхийлөгч болсон бөгөөд түүний бүрэн эрхийн хугацаа энэ оны тавдугаар сарын 13 хүртэл үргэлжилнэ.
Колумб Улсын Ерөнхийлөгчийн сонгууль тавдугаар сарын 29-нд болно. Одоогийн Ерөнхийлөгч Иван Дуке Маркес хоёр дахь удаагаа сонгогдох эрхгүй юм.
2022 оны Европын эмэгтэйчүүдийн хөлбөмбөгийн аварга шалгаруулах тэмцээн долдугаар сарын 6-31-нд зохион байгуулагдана. Дөрвөн жилд нэг удаа зохион байгуулдаг олон улсын хөлбөмбөгийн аварга шалгаруулах тэмцээн 2021 онд зохион байгуулагдах байсан хэдий ч цар тахлын халдварын улмаас нэг жилээр хойшлогдсон юм.
Энэтхэг Улс Их Британиас тусгаар тогтнон, хууль тогтоох эрх мэдлээ өөрсдийн болгосны 75 жилийн ойн баяр наймдугаар сарын 15-нд болно.
2022 оны хөлбөмбөгийн дэлхийн аварга шалгаруулах тэмцээн арваннэгдүгээр сарын 21-ээс арванхоёрдугаар сарын 18-ны хооронд Катар Улсад зохион байгуулагдана.
