2021-2022 оны хичээлийн жил эхэлснээс хойшхи хугацаанд 2-3 настнуудыг цэцэрлэгт хамруулах асуудал яригдсаар буй. Гэвч томуугийн улирал дуустал 2-3 настнуудыг цэцэрлэгт хамруулах шаардлагагүй гэх байр суурь, зөвлөмжийг ЭМЯ, ХӨСҮТ-ээс БШУЯ-нд хүргүүлснээ мэдэгдсэн. Тэгвэл тус асуудалд БШУ-ны сайд Л.Энх-Амгалан дараах тайлбарыг өглөө.

Тэрбээр "Өнгөрсөн 7 хоногт Монгол Улсын Засгийн газарт 2-3 настнуудын асуудлыг оруулсан. УОК, ЭМЯ-тай хамтарч эрсдлийн үнэлгээ хийгдсэн. Манай улсад томуугийн дэгдэлтээс үүдэн дахин эрсдэл үүсэх магадлалтай учир тус асуудлыг ирэх оны нэгдүгээр сар хүртэл хойшлуулахаар болсон.

Улс даяар 2-3 настнуудыг огт хамруулахгүй гэсэн зүйл байхгүй. Эрсдлийн үнэлгээгээр ковид болон томуугийн өвчлөл буурвал 2-3 настнуудыг нэг өдрийн өмнө ч болтугай цэцэрлэгт авах бодлого барьж байна.

Цаашид хүүхэд харах үйлчилгээнд 0-2 настнуудыг хамруулах ёстой юм байна гэх бодлого барьж ажиллана. Сүүлийн арван жилийн дунджаас авч үзвэл, намар хичээл эхлэхэд 2 настай 47 мянган хүүхэд бүртгүүлэхэд хавар 10 мянга хүрэхгүй хүүхдүүд л гурван настай анги руу ордог. Үндсэндээ, намар бүртгүүлж байгаа дөрвөн хүүхдийн гурав нь цэцэрлэгтээ явдаггүй гэсэн үг.